CEBU, Philippines - Pormal nang miduso og tulo ka kaso ang kapolisan sa lalawigan sa Sugbo batok kang Talisay City Mayor Socrates Fernandez kagahapon sa hapon diha sa buhatan sa Ombudsman for the Visayas kalabot sa giingong pag-abli niini sa sakyanan sa iyang anak nga si Joavan Fernandez nga gikustodiya na sa kapolisan niadtong milabay’ng Biyernes.
Kasong kalapasan sa Presidential Decree 1892 o Obstruction of Justice; Republic Act 6713 kon Code of Conduct and Ethical Standards for Public Officials and Employees Grave Misconduct ug Abuse of Authority.
Matud pa sa tulo ka pahinang reklamo nga sa wala pa mahitabo ang pag-serve sa search warrant sa Izusu Big Horn SUV ni Joavan gikatahong giablihan kini sa mayor ug may gikuhang kolor pula nga ladies bag.
Kini bisan paman gibuyag na kini ni PO2 Epifanio Comendido.
Samtang si provincial police director Sr. Supt. Erson Digal sa iyang bahin sa pakighinabi sa Banat News mibutyag nga igo lang siya nga miaprobar sa kasong giduso sa ilang imbestigador nga si SPO1 Elmo Rosales.
Ang mayor dihang gitawgan sa Banat News nagdumili una sa paghatag og komento kabahin sa maong kaso tungod kay iya pa usab kining ikonsulta sa iyang abogado nga si Atty. George Bragat.
Apan sa usa ka live interview sa RMN-DyHP niadtong milabay’ng adlaw nga Huwebes, ang mayor miinsister nga wala gani rekisaha sa mga nagbantay nga polis ang bag ug wala usab siya moisa sa iyang tingog.
Si Digal mipadayag usab og kasagmuyo sa gihulagway niyang “halang” nga komentaryo ni Atty. Ruphil Bañoc sa iyang programang ‘Birada’ nga nagtandi sa hitabo kang Joavan ug sa standoff sa Pulangbato sa dakbayan sa Bogo niadtong eleksyon.
Sa maong hitabo, si Mayor Celestino “Junie” Martinez mipasangil nga dunay mga armas ang sakyanan ni Rep. Benhur Salimbangon apan wala makadali-dali og kuha og search warrant si Digal niini.
Si Digal miesplikar nga lahi ang sitwasyon sa maong hitabo tungod kay dili siya maoy ground commander sa maong distrito atol sa eleksyon kundili ang iyang labaw nga mao ang chief of staff sa Police Regional Office-7 nga si Sr. Supt. Edgardo Ingking. – BANAT NEWS