CEBU, Philippines - Napaksit ang ulo sa traysikol drayber human kini madasmagi og bus de pasaheroan sa iyang pagliko aron unta mopik-ap og pasahero sa barangay Sabang, siyudad sa Danao niadtong miaging adlaw sa alas 12:50 sa udto.
Ang biktima mao si Danilo Ypil Mata, 61, minyo, molupyo sa barangay Suba. Samtang ang drayber sa D’Rough Rider bus (GVY-304) mao si Ranil Prieto Pinyas, 32, taga barangay Sta. Rosa, Danao.
Matud ni SPO1 Renante Manulat, traffic investigator sa Danao City Police Station sa dihang nahinabi sa Banat News nga ang maong traysikol ug bus pulos nagpaingon sa norte ug nag-una ang maong traysikol.
Apan pag-abot sa nahisgutang lugar mipabulhot ang bus aron unta pag-overtake apan naatol nga dunay pasahero nga mipara sa pikas bahin hinungdan nga mikalit og liko ang traysikol.
Wala na maka-break pa ang bus ug nadumbolan gyud ang miliko nga traysikol ug maayong pagkalimbuwad niini, samtang ang drayber nalagpot sa karsada ug nabagnos ang ulo ngadto sa sementong karsada.
Daling gihatod sa Danao District Hospital ang drayber sa traysikol apan tungod sa seryoso nga kadaot gibalhin kini sa Vicente Sotto Memorial Medical Center (VSMMC).
Samtang ang drayber sa bus boluntaryong mitahan sa iyang kaugalingon ug nagtingkagol na sa karsel samtang nagpaabot sa tukmang sumbong ipasaka batok kaniya. – BANAT NEWS