CEBU, Philippines - Lima ka mga lalaki ug lima ka mga armas ang nadakpan sa duha ka managlahing operasyon sa kapolisan sa miaging Sabado sa lungsod sa Carmen ug niadtong Biyernes sa gabii diha sa barangay Carreta ning dakbayan. Ang nadakpan sa Carmen sa mga sakop sa Regional Intelligence Unit-7 mao ang magsuong sila si Allen ug Peter Macoy nga nakuhaan og usa ka KG-9 submachine pistol ug kalibre 45 pistola.
Ang RIU-7 nakadawat og report gikan sa ilang impormante kabahin sa pagtinil og armas sa duha hinungdan nga mikuha sila og search warrant gikan sa korte ug dihang gironda ang panimalay nakuha ang moang mga ebidensya.
Samtang sa barangay Carreta, nadakpan ang mga sakop sa gang nga sila si John Rey Avila, 21; Archie Sebaga, 21; ug Casper Barawidan nga pulos molupyo sa sitio Tabay barangay Carreta.
Ang tulo nakuhaan tagsa og armas, si Avila nakuhaan kini og kalibre .38 Armscor nga adunay usa ka buhing bala ug usa ka black holster, si Sabaga nakuhaan usab og kalibre .38 nga adunay duha ka buhing bala samtang si Barawidan nakuhaan usab og kalibre .38 rebolber nga adunay duha ka buhing bala.
Matud pa ni PO1 Lloyd Magdadaro nga ang Theft and Robbery Section nagpahigayon og saturation drive sa maong dapit dihang ilang nasigpatan ang tulo sa maong lugar nga kadudahan ang mga lihok.
Dihang ilang gisitar ug gikapkapan nakuha kanila ang maong mga armas ug pulos napakyas pagpakita og lisensya ug dokumento paghupot niini hinungdan sa ilang pagkasikop.
Kasong kalapasan sa Comelec Gun Ban ug illegal nga paghupot ug armas mao unyay atubangon sa lima. – BANAT NEWS