CEBU, Philippines - Tulo ka tawo ang naangol apil na ang drayber sa traysikol human matagak sa bung-aw nga gibana-banang dunay giladmon nga 20 ka tiil sa ilang pagpauli gikan nga naghatud og lubong sa sitio Kamalig barangay Combado lungsod sa Tabogon niadtong Huwebes sa alas 3:20 sa hapon.
Ang mga naangol mao ang drayber sa traysikol nga si Reynaldo Espinosa, taga sitio Recodo barangay Manlagtang Tabogon.
Samtang ang iyang duha ka pasaherong naangol mao sila si Anecita Planar, 52, ug Panyo Toledo, 62, mga molupyo sa maong lugar.
Matud pa ni PO2 Alman Acabal sa Tabogon Police dihang nahinabi sa Banat News ang maong traysikol puno og sakay gikan nga naghatud og lubong sa sementeryo sa lungsod.
Gihulagway nga lihukan ang usa sa mga pasahero niini bisan og puno kaayo hinungdan nga pag-abot sa usa ka dulhugong bahin nawad-an og preno ang traysikol hinungdan nga nisarasay kini paingon sa kimba nga bahin.
Giingong misamot ang kalibog sa drayber dihang ang ubang sakay nag-iyahay og pangambak hinungdan nga nalahos kini sa bung-aw uban silang tulo.
Maayo nalang nasangit kini ug wala gyud malahos sa ubos nga bahin apan nakaangkon sila og mga samad ug pangos ang drayber ingon man ang duha ka pasahero niini nga wala makaambak og gipanghatod dayun sa Verallo District Hospital sa siyudad sa Bogo ug luwas na sa makuyaw nga kahimtang. – BANAT NEWS