CEBU, Philippines - Gidul-itan sa nawong pagpusil sa wala mailhing tawo ang usa ka 35-anyos nga lalaking nahinanok og katulog sa bangko kagahapon pasado alas-5 sa kabuntagon sulod sa basketball court sa barangay Kamagayan ning siyudad sa Sugbu. Ang gipusil ug namatay giila sa kapolisan nga mao si Joel Antig 35, nagpuyo sa Back Pepsi, sitio San Isidro, Mabolo ning dakbayan.
Gitumbok sa saksi ang usa ka wala mailhing tawo nga nagsul-ob kalo, itom nga jacket ug itom nga short pants maoy responsable sa pagpamusil.
Subay sa pasiunang imbestigasyon sa Homicide Section sa Cebu City Police Office (CCPO) pinaagi ni PO3 Geoffrey Gutual ug mga kaubanan nagbutyag nga naghigda ang biktima sa bangko nga kahoy dihang giduol sa mamumuno.
Si PO2 Cristobal Geronimo sa Homicide Section nga nahinabi sa Banat News miingon nga base sa nakuha nilang impormasyon giwahing una ang biktima sa wala mailhing mamumuno ug gisiguro ang dagway niini una pa gipusil duha ka higayon.
Ang biktima nakaangkon og samad pinusilan sa wala niyang aping ug milapos ang bala sa luyo sa iyang ulo nga maoy nakaingon sa hinanali niining kamatayon.
Human sa maong hitabo ang wala mailhing mamumuno yano ra kaayong milakaw paingon sa dalan D. Jakosalem ug wala na igkita sa mirespondeng kapolisan.
Nakuha sa kapolisan ang duha ka kabhang sa armas nga kalibre .9mm diha sa crime scene.
Usa sa ilang nahipos nga kasayuran nga gidudahang asset sa kapolisan ang biktima ug posibling naalaan lang kini hinungdan nga kini gipatay samtang ang laing anggulo nga gisusi mao ang karaang atraso sa biktima. Ang mga tawong nagpuyo sa dapit nagdumili pagsulti kanila og makatabang nga impormasyon kabahin sa biktima. (BANATNEWS)