CEBU, Philippines - Gusto ni Mayor Adelino Sitoy sa lungsod sa Cordova nga makabaton og kaugalingong district hospital ang ilang lungsod alang sa mga kabus aron dili nalang kini dad-on sa dakbayan sa Sugbo, gawas lang kun bug-at na kaayo ang balatian.
Si Mayor Sitoy nga nahinabi sa Banat News nagkanayon nga nawad-an og labing duol nga tambalanan ang lungsod sa Cordova human mahimong lone congressional district ang dakbayan sa Lapulapu.
Dugang pa niya nga kaugalingon na sa kagamhanan sa dakbayan sa Lapulapu ang Opon District Hospital human kini itugyan sa kagamhanan sa lalawigan ngadto sa maong dakbayan.
Gitataw niya nga ang Vicente Sotto Memorial Medical Center nga nagserbisyo sa mga pasyente sa tibuok rehiyon 7 matibhangan og atimanunong pasyente sa higayong may kaugalingong hospital ang Cordova.
Si Sitoy miingon nga sagkaon kaayo ang maong proyekto apan dako ang iyang pagtuo nga kahatagan kini og katumanan sanglit daghan mang nagtinguha nga motabang nga matukod ang maong tambalanan. - BANAT NEWS