CEBU, Philippines - Hingpit nang girelibohan ang kontrobersyal nga hepe sa kapolisan sa lungsod sa Samboan nga si Insp. Audie Pelayo sugod niadtong Miyerkules ug gibalhin sa Provincial headquarters.
Si Sr. Supt. Erson Digal, hepe sa kapolisan sa lalawigan nagkanayon iyang gibalhin si Pelayo sa Operation Branch ug gipuli niini mao ang deputy sa Naga Police station nga si Insp. Abell Laborte isip Officer in Charge (OIC) sa Samboan Police station. Si Pelayo nag-atubang og imbestigasyon sa Provincial Investigation and Detective Management Branch (PIDMB) sa Cebu Provincial Police Office human giingong hubog ug nakigsinukmagay sa iyang sakop nga si PO2 Oscar Perater niadtong miaging semana sa usa ka tigbakayan sa sitio Kalin-say sa barangay Poblacion. Si Pelayo hugtanong mihimakak sa tanang pasangil batok kaniya apan miangkong nakainom siya niadtong tungura apan dili hubog.
Si Pelayo sa unod sa iyang explanation ngadto kang Digal, siya nagkanayon nga niadto siya sa balay ni SPO1 Alex Aniñon sanglit pista sa Poblacion niadtong higayona, apan wala matagbaw si Digal niini.
“Wa ko ma-satisfied sa explanation ni Pelayo,..ang pag-angkon nga nakainom sa presence sa polis nga mag-inom-inom maot na tan-awon sa publiko,” pamahayag pang Digal.
Si Pelayo atol sa interbyu sa mga tigbalita miingon nga maghuwat nalang siya sa dagan sa imbestigasyon ug unsa man gani resulta niini andam niyang dawaton ang bisan unsang silot.
Matud ni Pelayo nga sa unom ka buwan niyang paglingkod duna sab siyay kalampusan kay nakadakop siya og illegal fishing. - BANAT NEWS