CEBU, Philippines - Ang grupo sa mga environmental lawyers dinhi sa Sugbu walay pagbabag sa pagtuboy ni Cebu City Mayor ug congressman-elect Tomas Osmeña nga mahimong Environment Secretary si konsehal Nestor Archival sa siyudad sa Sugbu.
Ang mga miyembro sa Global Legal Action on Climate Change kon GLACC-Cebu mihangop nga usa ka Sugbuanon ang mamahimong kalihim sa Department of Environment and Natural Resources kon DENR.
Kini tungod kay nakita nila nga paminawon gyud sa DENR ang mga yangungo sa mga environmental groups nga nagprotiher sa kalihukan pinaagi sa pagsulay sa pagbabag sa mga proyekto sa gobiyerno nga ilang nakitang makadaot sa katawhan ug kalikupan.
Sumala pa ni Atty. Gloria Estenzo Ramos, pangulo sa GLACC Cebu, nga nakakita sila sa maayong records ni Archival sa paghimo og pagpatuman sa mga programa pangkalikupan.
Matud pa ni Ramos nga alang kanilang mga grupo sa mga environmentalist dinhi sa Sugbu, si Archival maoy mas labing haom nga makalingkod isip kalihim sa DENR.
Si Ramos mitumbok nga ang ilang grupo dili magpanuko sa paghatag og endorsement ni Archival kun pangayoan sila niini.
Apan iyang gitataw nga kun ang administrasyon sa umaabot nga presidente sa nasud nga si presidente apparent Senador Noynoy Aquino moumol og search committee, ang ilang grupo igo na lamang sa paghatag og suporta alang kang Archival.
Sa iyang bahin, si Archival nagpasalamat sa pagtuboy ni Osmeña kaniya diha sa administration ni Aquino ug labaw sa tanan sa gihatag nga suporta sa mga environmental groups dinhi sa Sugbu. – BANAT NEWS