CEBU, Philippines - Patay ang drayber ug kritikal ang kahimtang sa duha ka angkas niini apil na ang 17-anyos nga dalagita sa dihang aksidenting mibangga sa punoan sa kahoy ang motorsiklo nga ilang gisakyan didto sa barangay Upland, siyudad sa Danao kagahapon sa ala una sa kaadlawon.
Ang patay nang nahidangat sa tambalanan mao ang drayber sa motorsiklo nga Honda wave kolor itom nga si Jemar Capol, 21, lumad nga taga Lutopan, siyudad sa Toledo apan kasamtangang nagpuyo sa Villasocoro, barangay Suba, siyudad sa Danao.
Samtang ang duha ka angkas niini nga anaa sa kritikal nga kahimtang mao si Clint Philip Doroy, 22, taga barangay Poblacion ug ang 17-anyos nga dalagita nga si Alprelym Lucernas, taga Guinsay, siyudad sa Danao.
Subay sa inisyal nga imbestigasyon ni SPO1 Renante Manulat, traffic investigator sa Danao City Police Station nga ang mga biktima gikan sa lungsod sa Carmen ug paingon sa siyudad sa Danao.
Apan pag-abot sa kurbadahon nga bahin sa maong lugar, aksidente nga mibangga ang motorsiklo ngadto sa punoan sa kahoy’ng Tugas sa daplin sa karsada. Ang kakusog sa pagpadagan maoy gituhoang hinungdan nga nawad-an si Capol sa kontrol.
Gihulagway nga mipilit ang drayber sa punoan samtang nangalabay ang duha niya ka angkas. Maayo usab nga pagkaguba sa motorsiklo.
Ang mga estambay maoy mitabang paghatod sa Danao City District Hospital apan gideklarar nga dead on arrival si Capol, samtang girekomendar nga ibalhin sa tambalanan dinhi sa dakbayan sa Sugbo ang duha ka angkas nga anaa sa talandugong kahimtang.
Dugang nahipos nga impormasiyon nga ang 17-anyos nga dalagita nabalian sa bukog samtang nakaangkon og dakong samad sa ulo ang 22-anyos nga si Doroy. – BANAT NEWS