CEBU, Philippines - Tulo ang naangol nga naglakip sa usa ka bayong-bayong sa dinasmagay sa duha ka motorsiklo didto sa barangay Poblacion, dakbayan sa Danao sa miaging gabii.
Ang mga biktima mao sila si Ronelo Morre, 50, taga sitio Quarry, barangay Looc, sa maong dakbayan, ang iyang asawa nga si Esterlita Morre, 50, ug Crister Pantalleon, 14, nga taga sitio Langlang, barangay Cogon Cruz, sa maong dakbayan nga maoy nagmaneho sa laing motorsiklo.
Si PO1 Rommel Costan, traffic investigator sa dakbayan sa Danao mibutyag sa Banat News nga ang motorsiklong gimaneho sa bayong-bayong nagpaingon sa kasadpang bahin sa Danao samtang ang motorsiklong gisakyan usab sa magtiayon, nagpaingon sa habagatan.
Apan pag-abot nila sa nagsangang karsada sa Poblacion, nadumbolan sa bayong-bayong ang motorsiklo sa magtiayon hinungdan nga silang tulo nagdungan sa pagpanglupad ug didto sila motugpa sa sementadong karsada.
Sa nagbay-ad na silang tulo sa karsada, may laing motorsiklo nga nagbaguros sa kakusog sa dagan ug milatay-latay sa ilang kalawasan, apan wala kini mohunong busa wala hiilhi.
Ang tulo ka mga biktima kansang kalawasan pulos nangabun-og ug nangabali gihatod dayon ngadto sa Danao City District Hospital. – BANAT NEWS