CEBU, Philippines - Duha ka ulitawo ang angol dihang giluba kini sa usa ka wala hiilhing lalaki atol sa gipahigayong kalingawan didto sa barangay Ilihan, dakbayan sa Toledo sa miaging kaadlawon.
Ang mga biktima mao sila si Isagani Razona, 23, ug Henson Jakosalem, 20, pulos ulitawo, nga pulos taga Sitio Jardin, barangay Ilihan sa maong dakbayan.
Matud pa ni PO1 Florante Cayson, sa Toledo City Police Station dihang nahinabi sa Banat News, nga ang maong mga ulitawo mitan-aw sa kalingawan sa ‘SK Night’ sa maong barangay nga nagsaulog sa piyesta niadtong higayona.
Sumala pa ni Cayson nga naggubot ang maong kalingawan tungod kay nagkaguliyang ang mga tawong nanan-aw, dihang usa ka tawong wala hiilhi miduslak sa iyang kutsilyo ngadto sa duha ka biktima.
Si Jakosalem nasabak sa walang bahin sa tiyan, samtang si Razona samdan usab sa dughan.
Ang duha nalandig sa tambalanan sa Toledo City District Hospital apan si Razona nga mao’y nagrabihan, gibalhin sa tambalanan sa dakbayan sa Sugbo.
Gipangita pa sa kapolisan ang kriminal. (BANATNEWS)