CEBU, Philippines - Patay ang drayber sa usa ka motorsiklo ug usa sa pasahero niini human makabinanggaay sa laing motorsiklo sa sitio Camandang, barangay Western Poblacion lungsod sa Poro sa isla sa Camotes niadtong milabay’ng adlaw.
Ang namatay diha-diha mao ang nagmaneho sa usa ka motor nga si Glen Limbaga, 39, taga sitio Bokok, barangay Western Poblacion, lungsod sa San Francisco samtang ang nakalas nga pasahero niini mao si Josefina Otadoy, 58, taga sitio Camandang, barangay Western Poblacion sa maong lungsod.
Samtang nangaangol usab ang pasahero ni Limbaga nga si Lolita Luchavez, 58, ug ang drayber sa nakabanggang motorsiklo nga si Jammy Maurillo ug ang sakay niining si Mateo Bucado, pulos taga sitio Naguba-an, barangay Poblacion sa lungsod sa Poro ug Pedro Relampagos, 77, taga sitio Tugas sa lungsod sa San Francisco.
Si Insp. Camilo Gonzaga, hepe sa Poro Police Station mibutyag sa Banat News nga si Maurillo paingon sa Poro nga kusog ang dagan ug wala kini makabawi sa kurbada sa nahitaboan ug misampak sa gimaneho ni Limbaga nga paingon usab sa San Francisco.
“Kusog mipadagan ang gimaneho ni Maurillo matud pa sa mga residente nga nakakita. Nibalhin na gani kini sa pikas nga linya sa dalan nga anaa pud ang gimaneho nga motorsiklo ni Limbaga,” sigon pa ni Gonzaga.
Daling gihatud sa Ricardo Maningo Memorial Hospital ang mga biktima apan gideklarar nga dead on arrival sila si Limbaga ug Otadoy tungod sa kadaot sa ulo.
Ang ubang naangol gidala sa usa sa mga tambalanan sa Sugbo. (BANATNEWS)