CEBU, Philippines - Gihimakak sa kampo sa gipatay nga independenteng kandidato sa pagka-konsehal nga si Crisostomo “Tata Negro” Llaguno ang report nga aduna kini P15 milyones nga gi-‘tambling’ maong kini gipatumba.
Ang campaign manager ni Llaguno nga si Ramon Resma sa pakighinabi sa Banat News diha sa ilang headquarters nagkanayon nga walay kamatuoran ang migawas nga report kabahin niini.
“Ang tawo gani nga maka-tambling og P15 million, bisan P1 million lang gani mahadlok na ka, di ba? Motago na ka, unya kana siya nganong nagpadayag pa man siya, suroy, kumpiyansa siya? Tungod kay dili na tinuod nga alegasyon,” matud pa niini.
Giklaro ni Resma nga ang pundong gigamit ni Llaguno sa iyang kandidatora nagagikan sa upat niini ka mga igsuong nakabana og mga foreigners, duha kanila miabot na dinhi gumikan sa nahitabo kang Llaguno.
Hugot ang ilang pagtuong politika ang motibo sa kamatayon ni Tata Negro gumikan sa kakusog ug ka-popular niini karon human makahuygo ang ilang pangampanya bisan kini independenteng kandidato.
Si Resma nanawagan sa taga National Bureau of Investigation (NBI) nga mohimo og lawom nga imbestigasyon kabahin sa nahitabo sa ilang kandidato. “Ako manawagan ko nga unta mapadali ang imbestigasyon kung kinsa gyud ang tinuod ug kinsa gyud nga nagsugo sa pagpapatay ni Tata,” matud pa ni Resma.
Nagduda og maayo si Resma nga ‘dakong tawo’ ang nalambigit sa kamatayon ni Llaguno base usab sa armas nga nakuha gikan sa suspek nga si Jaime Dialia.
Gipahigayon ang usa ka Santos nga Misa kagahapon sa hapon nga gitambungan sa mga leaders gikan sa nagkalain-laing mga barangay isip suporta sa mitaliwang Llaguno.
Gisaway usab ni Resma ang balaud sa Commission on Elections nga kung independente ang modagan, dili kini mamahimong hulipan.
“Sa akong nakita sa Batas Pambansa 881, Omnibus Election Code of the Philippines, akong nabantayan didto sa Section 77 wa man gyud na didto nga ingon nga dili pwede hulipan, mao na’y among gi-fight ‘ron. Kung tagaa’g kahigayonan nga modaog si Tata, among palingkuron si Carry Llaguno (igsuon ni Tata Negro) unya adto na mi mag-atubang sa Supreme Court,” matud pa niini. – BANAT NEWS