CEBU, Philippines - Kapin sa 50 ka mga supporters sa gipatay nga kandidato pagkakonsehal sa dakbayan nga si Crisistomo "Tata Negro" Llaguno mipahigayon og rally sa atubangan sa Comelec Cebu City North District office kagahapon sa buntag.
Sumala pa sa campaign manager ni Llaguno nga si Ramon Resma tuyo sa maong rally nga hangyuon ang Comelec nga mopadayon sila sa pagkampanya bisan patay na si Tata Negro.
Buot nilang kun mapili si Llaguno pagkakonsehal, ang igsuon niining si Garry Llaguno maoy ilang palingkuron ug masaligong modaog sila sa piniliay gumikan sa nakitang grabeng suporta sa mga tawo ug gianugonan sila niini.
Si Cebu City North District Election Officer Rudy Gilo mibutyag sa mga tigbalita nga dili sila makasigurong mahatag ang hangyo ni Garry Llaguno tungod kay independenteng kandidato kini base sa election laws.
Hinuon aron maklaro ang isyu ila nang gipadala ngadto sa Comelec Manila ang petisyon sa mga Llaguno.
Mibahad si Garry Llaguno nga mohimo sila og mas lapad nga protesta kun dili sila katugotan tungod kay mahimo kining sanglitanan sa uban aron sayon-sayonon ra og patay ang ilang mga kaatbang aron lang di kalingkod.
Dako ang ilang pagtuong politika ang hinungdan sa pagpatay kang Tata Negro niadtong milabay’ng Martes sa hapon samtang nangampanya sa Lorega.
Usa ka Jimmy Dialia nga gitumbok nga gunman ang nadakpan ug nakuhaan og usa ka kalibre .45 pistola nga nasubay nga iya sa gobiyerno. - BANAT NEWS