CEBU, Philippines - Dili mominos 13 ka tawo ang naangol, unom niini talandugon ang kahimtang apil na ang duha ka drayber dihang nagkabangga ang multicab sa barangay nga gimaneho sa tanod ug Toyota Corolla sa kurbadahong dalan didto sa sitio Taytayan barangay Agujo lungsod sa Daanbantayan niadtong Huwebes sa alas 9:30 sa gabii.
Ang Toyota Corolla nga gimaneho ni Erwin Nicolas Corro, 40, molupyo sa barangay Poblacion ug paryente ni mayoralty candidate Agusto ‘Itok’ Corro, gikatahong paspas nga nagpadagan tungod kay naka-hit and run kini sa sitio Camotes. Si Corro ug ang kauban niining si Silvano Russel, 48, nagpuyo sa maong lugar nangaangol usab.
Samtang ang mga naangol nga sakay sa gikabanggang multicab nga gipanag-iya sa barangay Poblacion mao ang tanod nga drayber nga si Vicente Son, 51, taga sitio Malinaw Poblacion ug mga pasahero ini nga sila si Celin Mcpike, 60, American national ug hinigugmang si Maristela Padon, 23, Corazon Padon, 53, inahan ni Maristila, Gerami Padon, 29, Darlo Padon, 19, nga SK-councilor, Alfred Padon, 15, Daylen Padon ,12, Crisante Rose Padon ,6, Riza Russel,23, unom ka bulang mabdos, Ariel Russel,14, ug May-an Cuyuca ,8, pulos molupyo sa sitio San Vicente Poblacion.
Matud pa ni PO2 Edwin Dignos, traffic investigator sa Daanbantayan Police dihang nahinabi sa Banat News ang Toyota Corolla gikan sa barangay Tapilon paingon sa Poblacion nga kusog ang dagan.
Sumala pa niini, si Corro paspas kaayo ang dagan gumikan kay naka-hit and run kini og duha ka babayeng sila si Girlie Alivio ug Merlinda Espina nga nagkugos pa og bata nga kapin sa tuig niadtong higayuna diha sa sitio Camotes. Ang duha nalandig sa tambalanan.
Matud pa pag-abot sa kurbadahong bahin sa maong lugar mikawat sa pikas linya ang awto ug nasugatan ang multicab nga gisakyan sa pamilyang Padon nga paingon sa Monsanto Beach resort sa barangay Maya.
Tungod sa kakusog sa impact ang ubang pasahero nangalabay ug nabunal hinungdan nga pulos nakaangkon og kadaot sa kalawasan ug pulos gihatud sa Daanbantayan District Hospital.
Apan ang unom apil na duha ka drayber nga si Corro ug mga pasahero nga sila si Ariel Russel, Gerami Padon, Corazon Padon ug Riza Russel ang gilahos sa tambalanan dinhi sa dakbayan sa Sugbo tungod sa talandugon nga kahimtang. – BANAT NEWS