CEBU, Philippines - Usa ka gituohang fratman nga giingong testigo sa pagpamusil sa iyang kauban ang gikaligoan og bala kagahapon sa hapon diha sa kilid sa Basak Elementary School sa barangay Basak siyudad sa Lapulapu.
Si Roberto Rosales Ferrer, 23, molupyo sa maong lugar nakaangkon og samad pinusilan sa nagkadaiyang parte sa lawas sa wala mailhing mamumuno.
Sa pakighinabi ni PO1 Ariel Villegas sa Banat News mibutyag kini nga mga alas-4 kagahapon ang biktima naghigda-higda sa usa ka payag sa nahisgutang lugar kuyog sa tulo ka mahuyang.
Apan sa kalit lang miabot ang usa ka lalaki ug mipusil kaniya gamit ang kalibre .45 nga miresulta sa iyang hinanaling kamatayon. Ang tulo ka mahuyang napakyas pag-ila sa mamumuno gumikan sa kapaspas sa hitabo.
Ang biktima witness sa nahitabong pinusilay sa iyang mga kauban niadtong miaging buwan batok sa karibal nga fraternity. (BANATNEWS)