CEBU, Philippines - Usa ka 13-anyos nga batang lalaki ang grabeng naangol human kini mapiit sa 10-wheeler truck nga gimaneho sa iyang amahan nga mibangga ngadto sa laing 10-wheeler truck niadtong Huwebes sa alas 4:00 sa kaadlawon diha sa Cebu South Coastal Road habig sa barangay Tanke, dakbayan sa Talisay.
Ang inahan sa bata nga nahinabi sa Banat News mibutyag nga gawas sa mga bun-og sa lawas mihubag usab ang tumoy sa kinatawo sa iyang anak tungod kay napiit kini ug giobserbahan pa sa doktor.
Ang maong bata gikuyog sa iyang amahan aron patabangon nga mag-truck boy samtang bakasyon.
Ang traffic investigator sa Talisay Traffic Division nga si PO2 Lino Diez mibutyag sa Banat News kagahapon nga ang truck nga gisakyan sa bata gikabangga ang trak nga gimaneho ni Marlon Cabaluna Silva.
Ang nagbanggang trak usa ray tag-iya nga mao ang Arbs Trucking nga nagbase sa barangay San Isidro sa maong dakbayan ug parehong nagkarga sa balas gikan Toledo padulong sa barangay Talamban sa dakbayan sa Sugbu..
Matud pang Diez nagpaabot si Silva sa amahan sa bata diha sa CSCR aron magdungan sila paghatud sa balas. Dangtan pila ka gutlo kalit misampak ang trak sa amahan sa bata diha sa luyong bahin sa iyang trak.
Ang amahan sa bata mitug-an sa kapolisan nga naputol ang brake sa iyang trak ug iyaha untang likayan ang trak sa kauban apan uwahi na kay misampak ang passenger side sa atubangan diin maglingkod ang anak niini.
Ang bata nakaangkon og grabeng bun-og sa lawas ug mata samtang gikabalak-an sa inahan ang pahibalo sa mga doktor nga gikahadlukang putlon ang kinatawo sa bata kun dili mohiyos ang paghubag niini. (BANATNEWS)