CEBU, Philippines - Patay diha-diha ang usa ka fixer sa Land Transportation Office (LTO) sa dakbayan sa Talisay human kini pusila sa wala mailhing mga tawong nagsakay og motorsiklo kagahapon sa hapon diha sa sitio Bapaka, barangay Pooc, dakbayan sa Talisay.
Ang biktima giila nila ni PO3 Alan Cuizon ug PO2 Jundave David nga si Loreto Lapingcao, 53, residente sa nahisgutang lugar nga nakaangkon og samad pinusilan sa tuong bahin sa iyang ulo nga milapos sa tuong apapangig nga nakaingon sa iyang kamatayon.
Si David nga nahinabi sa Banat News kagahapon nagkanayon nga sa wala pa mahitabo ang insidente si Lapingcao nagsakay og traysikol gikan sa LTO paingon nang mopauli ug dihang nanaog kini sa traysikol kalit gipusil.
Duha ka wala mailhing lalaking nagsakay sa kolor puwa nga motorsiklo ang kalit mihunong sa iyang tungod ug ang usa kanila ang mipusil sa biktima.
Matud ni David nga usa sa gitutokan nilang motibo ang kabahin sa trabaho tungod kay base sa ilang nahipos nga report dunay mga nasuko ni Lapingcao tungod kay duna kini gipang-‘tambling’ nga kwarta sa mga tawong misugo niya og pagparehistro og sakyanan.
Si David mibutyag usab nga bag-o lang nakagawas gikan sa prisohan si Lapingcao apan wala siya makahibawo kung unsay kaso niini nga maoy hinungdan sa iyang pagkapriso.
Si Lapingcao maoy ikaduhang fixer sa LTO sa Talisay kinsa gipatay.
Ang unang biktima mao si Joe Cauba nga matud usab ni David kauban ni Lapingcao isip fixer niadtong milabay’ng tuig.
Si Cauba gipusil patay sa wala mailhing tawo diha sa barangay Dumlog samtang naglakaw ug gituohan usab sa mga polis nga kalambigitan gihapon sa iyang trabaho isip fixer ang hinungdan sa pagpatay kaniya. (BANATNEWS)