CEBU, Philippines - Usa ka lalaki ang napalgang patay nga naglutaw-lutaw sa dagat sa South Road Properties (SRP) pasado alas-10 sa buntag kagahapon sa barangay Mambaling.
Ang maong lalaki gibana-banang nagpangidaron og 50 hangtod 60-anyos ug nagsul-ob kini og yellow shirt ug khaki short pants.
Sa pakighinabi sa Banat News ni PO3 Michael Codaste mibutyag kini nga usa ka mangingisda ang mitaho sa duha ka on-duty nga Bantay Dagat nga sila Antonio Tajer ug Victor Barinian kabahin sa patay’ng lawas.
Midugang si Codaste nga ilang nakuha sa bulsa sa shorts sa biktima ang Comelec ID ug SSS ID nga adunay pangalan nga Cabusas Francisco nga molupyo sa sitio Sunshine barangay Inayawan ning dakbayan.
Ang opisyales sa barangay Inayawan gipangayoan na og tabang sa kapolisan aron pagsubay sa maong ID kun mao ba kini ang patay’ng lawas.
Gihulagway ni Codaste nga presko pa ang patay’ng lawas sa biktima ug miagi kini og sunggo ug gani ang dalunggan niini aduna pay dugo apan wala pa matino kun duna bay foul play sa kamatayon niini. (BANATNEWS)