CEBU, Philippines - Patay ang usa ka habal-habal drayber nga negosyante human kini pusila sa iyang silingan kagahapon sa buntag diha sa San Antonio Village sa barangay Apas ning dakbayan.
Si Freddie Albacite Yosores, 27,taga sitio Upper Panabang sa nahisgutang lugar ang gipusil ni Charlito Regidor Espaltero, 28, konduktor nga taga barangay Bulak, lungsod sa Dumanjug.
Ang kapuyo sa biktima nga si Christina Burzon, mitug-an nga nagpreparar sa mga paninda si Yosores sa waiting shed sa parkingan sa mga habal-habal dihang kalit nga miabot ang suspek ug gipusil kini.
Sa report sa TV Patrol Central Visayas nakabsan gyud sa kinabuhi ang biktima.
Ang biktima naigo sa tangkugo ug milahos sa tuong bahin sa iyang liog apan dihang tiwasan sa suspek ginamit ang kalibre.38 mikagar kini hinungdan nga miikyas nalang kini.
Apan ang suspek nadakpan sa mirespondeng tanod nga si Reynaldo Almonte ug nakuha ang armas niini nga may lima ka buhing bala ug usa ka kabhang.
Ang suspek mitug-an sa mga tigbalita nga napuno na siya sa kabati og batasan sa biktima ug dugay na usab kini may atraso kaniya. (BANATNEWS)