CEBU, Philippines - Si Nacionalista Party Sen. Manny Villar mopahigayon og rally karung hapon sa dakbayan sa Talisay, Cebu City, Mandaue ug Lapulapu City.
Apan sa dili pa ang rally dunay hand shaking ang kampo ni Villar sa maong mga lugar ug gikatahong pasirad-an ang dalan sa Tabunok ugma sa hapon aron dili makamugna og bagang duot sa trapiko.
Si Cebu City Kusug mayoralty candidate Alvin Garcia maoy mipahibawo niini kagahapon sa press conference.
Matud pa ni Garcia sa dili pa magsugod ang rally sa Cebu Coliseum nga sugdan sa alas-4 sa hapon ang tanang slate sa Kusug maoy unang makigpulong ngadto sa liboan ka mga supporters sa ilang partido.
Unahon pagbisita ni Villar ang dakbayan sa Talisay, dayon sa Cebu Coliseum, Mandaue ug Lapulapu City.
Matud ni Garcia nga dunay inilang singer ang mokuyog ni Villar sama nila ni Jessa Saragoza, Randy Santiago, Mae Rivera, ang ang banda nga Six Cycle Mind ug ang bold stars nga ginganlan OG Alesna ug Princess.
Si Garcia mipasabot nga gituyo nilang sa Cebu Coliseum ang rally ni Villar aron dili sila makamugna og trapik nianang mga orasa sanglit tinggawas sa mga trabahante dinhi sa siyudad.
Nunot niini giawhag ni Garcia ang supporters sa Kusug ug sa NP nga motambong sa dakong rally karung hapon.
Si Congressional Aspirant Jonathan Guardo sa Cebu South district nagkanayon nga 10 mil ka tawo ang ilang gipaabot nga motambong sa rally ni Villar. (BANATNEWS)