CEBU, Philippines - Usa ka kandidato sa pagka-konsehal sa dakbayan sa Talisay ubos sa administrasyon ug presidente sa Association of Barangay Captain (ABC) Osmundo Manreal Jr. gipasanginlang mi-house to house og patawag sa mga residente sa sitio Maharlika, barangay Pooc ug nanghatag og P20 sa mga mitambong sa tigom.
Si Manreal maoy kapitan diha sa nahisgutang barangay, usa sa mga sakop sa Media in Cebu South (MICS) nakadawat og text kabahin sa giingong pagpanghatag sa maong barangay kapitan og kwarta.
“Gud am sir, ABC Pres. & Admin candidate Osmundo Manreal Jr. mi-house to house og patawag sa sitio Maharlika, walay official letter/notice adtong Abril 15 nga paadtuon sa balay sa kapitan inig ka ugma, Abril 16, ang nangadto gipanagaan og tag P20, kasayo gud nila mamalit og votes?, dili na sila kapaabot og Mayo 9? Gawas pa, kabarato na lang gyud sa pagtan-aw ni kapitan sa Poocanon? Kang kinsa ning kwarta?, buhis nato?, Gitugotan ba kini sa iyang kapartido? O iya ba lang hinuon gikopya sa iyang kaubang kandidato?,” sumala pa tipik sa mga mensaheng nadawat sa tigbalita.
Si Manreal nga nahinabi sa Banat News kagahapon mihimakak sa maong pasangil ug matud niini nga isip kapitan sa barangay nagpatawag siya og tigom sa iyang mga molupyo ilabi na nga hapit na ang pista diha sa sitio Maharlika ug buot niyang masayran ang mga problema sa maong sitio ilabi na nga hapit na kini magsaulog sa ilang pista sa hinapos niining buwana.
Matud usab ni Manreal nga wala siya mamugos sa mga residente sa lugar nga muadto sa ilang balay ug mihimakak usab nga nanghatag siya og tag P20.
Giklaro niyang ang iyang igsuong seaman nga si Lascio nga bag-uhay pang miabot gikan overseas giparaygan sa mga bugoy og panigarilyo maong gihatagan kini sa iyang igsuon og kwarta, nagtuo si Manreal nga gilain pagsabot sa mga kritiko ang gibuhat sa iyang igsuon.
Gibutyag sa kapitan nga duna siya’y nadawat nga taho nga dunay mga residente diha sa sitio Maharlika nga nagkabangi tungod kay dunay midapig kaniya ug dunay midapig kang Dory Emit kinsa kandidato sa pagkakonsehal sa oposisyon. – BANAT NEWS