CEBU, Philippines - Si kanhi custom collector David “Boy” Odilao mipasaka og kasong libelo diha sa Talisay City Prosecutors Office niadtong Biyernes batok kang Anad Partylist Kong. Pastor Alcover Jr. ug reporter nga si Elias Baquero sa Sunstar Daily ingon man sa editor-in-chief sa nahisgutang pamantalaan nga si Isolde Amante.
Si Odilao kinsa nahinabi sa mga tigbalita kagahapon mipasangil nga ang artikulong namantala sa nahisgutang pamantalaan niadtong Abril 10, 2010 nga gisuwat ni Baquero malisyoso ug gani wala siya kuhai sa maong reporter og pamahayag aron makadepensa siya sa iyang kaugalingon.
Matud pa ni Odilao migawas nga gipasanginlan siyang nakadawat og kwarta gikan kang Davao City Mayor Rodrigo Duterte nga karibal usab ni Alcover sa politika.
Si Odilao mihimakak niini kay wala siya makaila kang Duterte ug wala usab sila personal nga nagkakita niini. Si Odilao nagkanayon nga kung duna man gani bangi si Alcover ug Duterte wala siya’y labot ani ug dili siya angayang iapil sa maong isyu.
Laing tipik sa maong balita nga natala nga si Alcover mibutyag nga si Odilao iyang gitaktak gikan sa Anad sayo niadtong Pebrero 2010 human giingong gidagan niini ang kwarta sa partylist.
Si Odilao mipasangil nga kanunay nang gidaot ang iyang personalidad sa kampo ni Alcover ingon man nakadawat na siya og mga hulga kalabot niini.
Sa iyang bahin, si Alcover nga nahinabi sa Banat News wala matandog sa kiha ni Odilao. “Let him file the case,” pasabot pa niini ug midugang nga andam niya kining tubagon, matud pa niya nga giunhan siya ni Odilao og pasaka og kaso kay nakahibalo naman kining may plano silang (Alcover) mopasaka og kasong falsification of public document ug perjury batok kang Odilao kabahin sa pagkatudlo niining first nominee sa Anad Partylist. (BANATNEWS)