CEBU, Philippines - Mibahad ang mga environmental lawyers dinhi sa Sugbu nga mopasaka og kasong writ of Kalikasan batok kang Gob. Gwendolyn Garcia ug mga opisyales sa Kapitolyo nunot sa pagtambak og hazardous nga coal ash sa habagatang bahin sa lalawigan.
Matud pa ni Atty. Benjamin Cabrido sa interview sa DyRF nga siya uban ni Atty. Gloria Estenzo Ramos ug ubang mga environmental lawyers nagpadayon karon pagtuon sa mga ebidensiya aron ila kining mapasaka diretso ngadto sa Korte Suprema. Kini human namatud-an sa test report sa Philippine Institute of Pure and Applied Chemistry (Pipac) sa Ateneo de Manila University Campus didto sa Quezon City niadtong Enero 18, 2010 nga ang coal nga gipangtambak sa nagkadaiyang bahin sa dakbayan sa Naga ug sa Pitalo sa San Fernando may lama sa heavy metals nga mao ang arsenic, cadmium ug mercury nga makadaot sa kalikupan ug katawhan.
Matud pa ni Cabrido nga ilang suwayan ang bag-ong gipatumang “environmental rules and procedures” nga nagtumbok nga mahimong direktang masang-at sa Korte Suprema ang kasong writ of Kalikasan kun may duha na ka dagkong lugar ang maapektohan.
Samtang sa iyang bahin, ang tigpamaba sa Kapitolyo nga si Atty. Rory Jon Sepulveda miingon nga andam kaayo nga moatubang si Garcia ug ang ubang mga opisyales sa Kapitolyo sa maong kaso.
Apan gitataw ni Sepulveda nga ang resulta sa examination sa Philippine Institute of Pure and Applied Chemistry (Pipac) sa Ateneo de Manila University Campus gikinahanglan nga i-kompirmar sa tinuoray’ng regulating body nga mao ang DENR.
Gitataw hinuon ni Sepulveda nga kun ang DENR moingon ang coal ash sa KEPCO hazardous, ang Kapitolyo dili magpanuko sa pagsupak sa balaod ug dili mogamit sa coal ash sa KEPCO alang sa reclamation sa Tinaan, Naga. – BANAT NEWS