CEBU, Philippines - Siyam ka polis ang gi-reshuffle karon aron kalikayan nga may kakonsabo kining mga kandidato alang sa umaabot nga piniliay sa Mayo 10.
Sila mao si Police Supt. Henry Biñas nga hepe sa syudad sa Talisay ug ibalhin kini sa dakbayan sa Naga, samtang si Police Supt. Anthony Bagarinao nga nadestino sa dakbayan sa Naga ibalhin usab ngadto sa syudad sa Danao.
Si Police Supt. Elmer Lim nga nadestino sa syudad sa Danao ibalhin usab sa syudad sa Carcar, samtang si Chief Insp. Alvin Balio nga nadestino sa lungsod sa Poro ibalhin usab sa lungsod sa San Francisco.
Si Insp. Camelo Gonzaga nga nadestino sa syudad sa Carcar mao nay mahimong deputy sa lungsod sa Poro, ug si Insp. Anecito Gesalago nga nadestino sa San Francisco ibalhin ngadto sa syudad sa Carcar. Si Chief Insp. Rogelio Amoroso Jr. nga nadestino sa Provincial Investigation Branch mao nay mahimong Officer In-charge sa lungsod sa Ronda samtang si Insp. Sandi Roble nga gikan sa Ronda maoy himoong hepe sa Special Reaction Unit (SRU) ug si Insp. James Conaco mao nay himoong deputy chief sa SRU.
Matud pa ni Cebu Provincial Police Director Erson Digal nga ang pag-reshuffle sa mga kapolisan maoy usa sa pamaagi nga mawala ang mga pagduda nga magkakonsabo sa mga binuang ang kandidato ug polis sa usa ka lugar.
Samtang mipahimangno si Digal sa iyang kapolisan nga apiktado sa maong lahugay nga kinahanglang ipakita nila sa katawhan nga sila kapiyalan ug kasaligan ug dili maoy magmugna og binuang sa dapit nga ilang nadestinohan.
Gibutyag usab ni Digal nga dili lang unta magpadala ang kapolisan sa mga sulsol sa politiko nga hakog og gahom.
Midugang siya nga unta ipadayon sa kapolisan ang pagtuman sa balaod nga kinahanglang dili sila mag-apil-apil sa pagpangampanya sa mga kandidato sa election sa Mayo 10. – BANAT NEWS