CEBU, Philippines - Temporaryong pasirad-an ang trapiko sa Tipolo Bridge siyudad sa Mandaue sa mosunod nga unom ka buwan alang sa rehabilitasiyon sa maong taytayan nga gigahinan sa nasudnong kagamhanan og P18 milyones.
Niadtong Lunes pormal nang gisugdan sa BNR Construction and Development Corporation inabagan sa DPWH-7 ang konstruksyon sa maong proyekto.
Si Kong. Nerissa Soon-Ruiz nga kandidatu pagka mayor sa dakbayan sa Mandaue mi-apelar sa mga molupyo sa kahasol nga masinati samtang gipahigayon ang konstruksyon aron palapdan ang maong taytayan.
Matud pa ni Ruiz igo lang niyang gitubag ang mga yangungo sa mga molupyo ug mga motorista nga kanunay magbagulbol sa grabeng pagdasok sa mga sakyanan pag-abot diha sa maong taytayan.
Ang district engineer nga si Mario Montejo nakig-alayon na sa Traffic Enforcement Agency of Mandaue City (TEAM) alang sa gipatumang rerouting sa mga sakyanan nga moagi sa maong lugar. - BANAT NEWS