CEBU, Philippines - Bisan pa og nagsingabot ang eleksiyon karong bulan sa Mayo apan gi-aprobahan gyud sa konseho sa dakbayan sa Mandaue ang pagpahigayon sa rehabilitasiyon sa mga guba-ong lawak saringan sa lain -laing publikong tunghaan sa maong siyudad pagpangandam sa subling pagbukas sa klase karong Hunyo.
Ang konseho sa dakbayan sa miaging sesyon nga gipangulohan ni Bise Mayor Carlo Fortuna mi-aprobar sa rekomendasyon alang sa pagsud og kontrata sa siyudad pagpaayo sa mga guba-ong lawak saringan.
Girekomendar sa konseho ang pagpa-ayo sa karaan nang mga school buildings sa Maguikay Elementary School, ingon man rehabilitasiyon sa mga guba-ong classroom sa Mandaue City Comprehensive National High School, pag-ayo sa mga guba na nga lawak saringan sa Cesar M. Cabahug Elementary School sa grade 6 ug grade-2.
Matud ni bise mayor Fortuna dihang nahinabi sa Banat News sa telepono nga apil sa ilang gi-aprobahan ang pagbutang og perimeter fence sa Tabok National High School sa Tabok.
Gipasabot ni Fortuna nga gihatagan nila og prayoridad ang suliran sa mga guba-ong classroom aron dili na makasugat og grabeng problema ang mga tinun-an sa publikong tunghaan sa dakbayan sa subling pagbukas sa klase karung Hunyo.
Dugang sa bise mayor nga gihimo na nila sa konseho ang ilang gimbuhaton ug pagkakaron anaa na sa buhatan ni mayor Jonas Cortes ang pagpatuman sa pagsugod sa konstruksiyon sa mga ayuhonon nga mga school buildings gamit ang pundo sa dakbayan.
Si Fortuna mipahibawo niining maong mga kontrata nga gipasar sa konseho aron pagpapas sa mga pasangil nga gibabagan nila sa konseho ang mga proyekto sa maong siyudad. (BANATNEWS)