CEBU, Philippines - Usa ka puya nga patay na gisalibay sa wala hiilhing tagtungod didto sa kadagatan sa Ouano Wharf sa barangay Looc, dakbayan sa Mandaue sa miaging gabii.
Si Inspector Wilson Abot, deputy chief sa Presinto 5 sa Opao Police Station miingon nga ang maong patay nga puya nga usa ka lalaki gibanabanang lima ngadto sa pito ka bulan pa sa tiyan sa inahan, apan gilabay kini maora og basura. Sa pakighinabi sa Banat News kang SPO1 Reynaldo Urot nasuta nga usa ka wala hiilhing molupyo nga nagpakabana maoy misugilon kanila labot sa puya nga ilang nakaplagan.
Si SPO1 Urot miingon nga ilang giugkat ang maong puya ug ilang gipahibalo ang buhatan sa city health office niini.
Dugang pa ni Urot nga ila nang giimbistigar kining maong kaso ug gipanid-an kinsang inahana ang misalibay sa kalag nga naumol na sa iyang taguangkan.
Ang mga tinugyanan sa city health mao nay mipalubong niini aron sa pagtuman sa gitakda sa balaod. – BANAT NEWS