CEBU, Philippines - Kritikal ang kahimtang sa usa ka tourist guide sa Kawasan falls human kini giunay pagpusil makadaghang higayon sa iyang maguwang sa dihang nangahubog sa panag-inom sa barangay Matutinao, lungsod sa Badian niadtong Huwebes sa alas 10:15 sa gabii.
Naputos og samad pinusilan ang kalawasan ni Roldan Aspacio, 29, human gipusil makadaghan sa maguwang nga si Lemuel Aspacio, 31, kauban niyang tourist guide.
Matud ni PO3 Emmanuel Caballero sa Badian Police Station sa dihang nahinabi sa Banat News subay sa gihimong imbestigasyon sa witnessnga si Ledio Delobio, 37, tourist guide, nga nag-inom sila ni Lemuel sa pinuy-anan sa dihang kalit miabot si Roldan nga hubog.
Nanaglalis ang magsuon kay dili na mopatuo si Roldan hinungdan nga napungot si Lemuel ug mikuha og armas nga wala matino ang kalibre.
Si Roldan nga nakabantay midagan pahilayo apan gigukod kini ug naapsan ug gipusil makaupat ka higayun sa suspek ug nahagba dihadiha. Si Lemuel misibat. Daling gihatod sa Badian District Hospital si Roldan apan tungod sa daghang samad pinusilan sa bukobuko nga milapos sa hawakan ug ubang bahin sa lawas gibalhin kini sa tambalanan sa dakbayan sa Sugbo. Ang maguwang gigukod sa mga awtoridad, pero wala pa madakpi. – BANAT NEWS