CEBU, Philippines - Gitun-an sa kagamhanan sa dakbayan sa Sugbo ang pagpasaka og kasong kriminal, sibil o administratiba batok sa kontraktor sa nahunlak nga firewall sa padayong gi-construct alang sa usa ka mall sa barangay Tisa ning dakbayan sa milabay'ng kaadlawon nga nikalas og lima ka kinabuhi sa mga construction workers ug laing unom ang naangol.
Gibutyag ni Konsehal Gerry Carillo,chairman sa Cebu City Disaster Coordinating Council nasuta sa pasiunang imbestigasyon nga napakyas gyud ang maong kontraktor pagpatuman sa labor safety standards sama sa pagbutang og protective gears sama sa helmet sa mga trabahante.
Dugang ni Carillo nga atol sa ilang gipatawag nga tigum sa miaging hapon tali sa management sa Gaisano Capital nga maoy nanag-iya sa gitukod nga mall ug sa CYC Construction gimanduan nila ang kontraktor nga korehian ang tanang mga depekto.
Temporaryong gisuspenso ang konstruksiyon samtang magpadayon ang imbestigasyon sa maong trahedya, gitan-aw pa usab ang construction integrity sa maong edipisyo kung dili ba kini peligroso kun ipadayon.
Adunay linaing imbestigasyon ang Office of the Building Officials (OBO), CCDCC ingon man ang Bureau of Fire Protection (BFP) sa aksidente ug maghiusa pagduso og rekomendasyon ngadto sa City Attorneysoffice.
Gipasabot sa konsehal nga ang City Attorneys Office maoy ilang tugyanan pagtimbang-timbang sa posibleng mga kasong ipasaka batok sa kontraktor.
Laing nasuta sa gihimong pakisusi sa CCDCC ang kapakyas pagbutang og safety engineer sa maong kontraktor nga maoy mag-monitor sa nagpadayong konstruksyon nianang tungura subay sa nalatid sa probisyon sa Labor Code.
Pagkakarun ang kontraktor gimandoan pagtiwas sa paghipos sa nahabiling mga debris nga peligro pang mahunlak ug paghipos sa mga debris nga nitabon sa drainage ug sa dalan ug gimanduan usab kini nga magbutang og protective nets aron dili matagakan ang mga tawo nga moagi sa ubos nga bahin samtang nagpadayon ang konstruksyon.
Gi-klaru sab sa konsehal nga gitun-an pa usab karun kun angay paba nga ipadayon o ipahunong ang konstruksyon sa maong edipisyo human sa maong trahedya. – BANAT NEWS