CEBU, Philippines - Lima ka bata nga taga barangay Tapul, bukirang barangay sa dakbayan sa Talisay gikonpirmar nga nasugamak sa sakit nga dengue samtang ang laing pito nga sa sayo pa gisuspetsahan lang nga may dengue, nakagawas na sa tambalanan.
Samtang laing duha na usab ka bata karong bag-o ang gipanghilantan ug gidudahan usab nga adunay dengue.
Si Ryan Bacus amahan ni Kristof Ryan Bacus, 3 anyos, ug usa sa mga nabiktima sa dengue mibutyag kagahapon sa Banat News nga niadtong kataposang semana sa buwan sa Enero niining tuiga na-admit ang iyang anak sa Vicente Sotto Memorial Medical Center diin didto gitino nga nasugamak sa dengue ang maong bata.
Gumikan sa ka delikado sa kahimtang sa iyang anak , si Bacus nagkanayon nga gibalhin kini niya ngadto sa Sacred Heart Hospital ug migawas kining maayo na niadtong Pebrero .
Giila usab ni Bacus ang lain pang mga bata nga silingan nila nga konpirmado usab nga nataptan og dengue nga mao sila si Mary Jane Jimenez, 7, ug Randy Regodos, 14, kinsa na-admit niadtong Huwebes Santo sa VSMMC ug migawas kini niadtong Martes, Andrea Piezas, 4, ug Liezandrie Abangan Paires, 2 anyos.
Samtang ang upat sa pito nga gidudahang may dengue mao ang duha ka managsuong Piezas nga sila si Rica Marie , upat ka buwan palang ang pangidaron ug John Anthony, duha ka tuig, Elmer Abacahan ,8-anyos , ug si Krista Ellaine.
Midugang si Bacus nga may laing duha na usab karong bag-o sa ilang mga silingan ang gipanghilantan apan wala niya makuha ang mga pangalan niini.
Ang city health office sa siyudad padayon nang mipaaso sa mga suok-suok nga bahin sa barangay ilabi na kadtong dapit nga hugaw kaayo nga maoy tigumanan sa lamok.
Hinuon ang kagamhanan sa siyudad mihinabang og tambal ngadto sa mga nabiktima sa balatian ug duna usab silay mga health card gikan kang Kongresista Eduardo Gullas.
Sa laing bahin, si Talisay City Administrator Richel Bacaltos mibutyag sa Banat News nga nakugang sila sa insidente.
Matud niya nga iyang paeksplikahon ang mga tinugyanan sa city health office nganong wala sila maalarma sa maong hitabo nga ang matag barangay aduna may mga health workers.
Kagahapon ang mga sakop sa city health office pinangulohan ni Dr. Lino Alazando, hepe sa nahisgutang buhatan nangunay sa pagsaka ngadto sa nahisgutang barangay ug mipahigayon og imbestigasyon sa hitabo. – BANAT NEWS