CEBU, Philippines - Ang SPC Power Corp. mitaktak sa duha ka kawani sa Naga Power Plant Complex samtang nag-atubang ang duha og kasong libelo uban sa usa ka opisyal sa NGO sa Manila nga parehong giisyuhan og warrant of arrest sa Regional Trial Court of Makati.
Gitaktak silang Gaudioso Iso Jr. ug Joel Tolentino tungod sa libeloso nilang sulti o pag-asister sa pagmantala sa “defamatory and libelous statements” batok sa kompaniya.
Si Iso, Tolentino ug Dr. Giovanni Tapang sa Samahan ng Nagtataguyod ng Agham at Teknolohiya para sa Sambayanan nag-atubang og kasong libelo sa sala ni Judge Elmo Alameda sa branch 150 sa RTC-Makati ug giisyuhan og warrant of arrest niadtong Enero 28, 2010.Ang Investigating Panel-Disciplining Authority sa SPC nakasota sa duha nga sad-an sa salaod nga “serious misconduct, dishonesty for causing the publication of malicious statements, breach of trust, and willful disobedience.” Ang mando pag-dismiss gipirmahan sa panel chairman nga si Reinerio Lastimoso ug mga sakop nga sila si Romulo Capuras ug Jocelyn Capule.
Si Iso ug Tolentino, presidente ug kalihim sa Salcon Power Independent Union (SPIU), mihulagway sa dismissal nga ilegal tungod kay ang kaso wala pa maresolbar sa korte ug misang-at og unfair labor practice sa National Labor Relations Commission (NLRC), Regional Arbitration Branch No. VII.
Apan ang SPC Power Corp. nagkanayon nga buot lamang niining makab-ot ang kamatuoran ug makorehian ang mga sayop niini.
Ang kasong libelo gisang-at human namahayag ang tulo atol sa Mayo 28, 2009 nga press conference nga ang SPC nagdawat og “excess payments from the National Power Corporation (NPC) in the amount of P738 million that it should refund to the consumers.”
Laing pamahayag nga gihulagway sa SPC nga libeloso mao: NPC paid the company salaries for 354 employees for the past 15 years. However, there are only 190 employees in the company. The difference of 164 employees multiplied by an average monthly salary of P25,000 yields an amount of P4.1 million a month or P738 million for 15 years.”
Miakusar usab sila nga ang kompaniya adunay ‘silent profits’ nga bilyones pesos sa pagpamalit og coal ug laing fuel products sa planta. Ang SPC Power Corp., pinaagi ni Senior VP for administration and finance Alfredo S. Ballesteros, nangayo og P1.5 milyones nga danyos sa tulo. Bulag nga damage suit gisang-at usab sa SPC batok sa tulo sa RTC Makati. - BANAT NEWS