Balay girakrakan bongbong natusak

CEBU, Philippines - Gitusak-tusak sa mga bala ang usa ka balay samtang nangatulog ang tagbalay niini  human rapidoha sa mga armadong mga lalaki nga wala hiilhi didto sa barangay Malingin siyudad sa Bogo kagahapon sa alas 2:00 sa kaadlawon.

Si SPO2 Rogel Layson sa Bogo City Police mibutyag sa Banat News nga ang tagbalay nga si Marilyn Delfero Catadman, 50 , minyo, nagtibi nga midangop sa ilang buhatan ug misumbong sa maong hitabo.

Subay sa pasiunang   imbistigasyon sa kapolisan nasayran nga puwerting katuga sa pamilyang Catadman niadtong tungora hinungdan nga wala sila makamatngon sa mipaka-paka nga mga armas de fuego sa gibana-bana nilang duha ngadto sa tulo ka tawo..

Nangabuak ang jalousy sa bintana sa ilang balay samtang ang atubangang bahin niini natusak sa mga bala ug ang mga kilid nangapaksit agi sa mga bala sa wala hiilhing kalibre sa armas nga gigamit sa pagpangrakrak.

Ang miresponding mga polis nakapunit og upat ka kabhang sa bala sa wala pa matino nga kalibre.

Ang kapolisan sa Bogo padayon pa karong naniid kinsay responsable sa maong pagpangrakrak samtang gisusi nila ang tagbalay kun kinsay atraso nilang tawo.

May kalagmitang kadumot sa tagbalay ang mipauwan og bala kanila busa dili sila angayang magkompiyansa sumala sa pahinumdom sa kapolisan.

Wala usab ibutyag sa mga biktima kun kinsay nagdumot kanila nga maoy kalagmitang mopatay unta kanila. - BANAT NEWS

Show comments