CEBU, Philippines - Mahimo nang mapadayon ang nauktabang plebisito sa pagbuwag sa Banawa-Englis gikan sa barangay Guadalupe nga gikatakda unta niadtong Marso 13 kay wala nay makababag niini.
Kini human gibasura ni Regional Trial Court kon RTC-7 Branch 58 Judge Gabriel Ingles ang petition for issuance of Writ of Preliminary Injunction nga giduso sa korte ni Labangon barangay kagawad Victor Miñoza Buendia nga mikwestyon kun ang Rosalina Village nahisakop ba sa barangay Labangon o sa barangay Guadalupe.
Matud pa ni Judge Ingles sa iyang unom ka pahinang desisyon nga napakyas si Buendia sa pagprobar sa korte nga ang gilalisang Rosalina Villege nahisakop sa barangay Labangon aron makapangangkon kining maapektohan ang iyang mga botante sa barangay.
“What is clear at this time is that petitioner failed to adduce evidence that can justify the issuance of a writ of preliminary injunction. Accordingly, the application for a writ of preliminary injunction is denied,” nagkanayon si Ingles sa iyang hukom kagahapon. Gihatagan og gibug-aton ni Ingles ang testimonya ni Jose Marie Poblete, ang Secretary sa Sangguniang Panglungsod sa siyudad sa Sugbu nga mipakita sa barrio map nga may Resolution No. 1925 nga napasar sa konseho niadtong Octobre 27, 1966 nga naglatid sa utlanan sa nagkadaiyang barangay ug nakita nga ang Rosalina Village sakop gyud sa sitio Banawa, Guadalupe.
Samtang gihatagan og gibug-aton ni Ingles ang laing gipakitang dokumento ni Poblete nga Ordinance No. 1661 nga napasar niadtong Disyembre 18,1996 nga nag “define and delineate” sa utlanan sa Guadalupe ug naapil niini ang Rosalina Village apan gitataw niini nga pipila sa mga dapit sa Guadalupe ang nahasakop sa Comelec precincts sa barangay Labangon. (BANATNEWS)