CEBU, Philippines - Napakyas ang Argo Forwarder pagtambong sa usa ka joint conference sa Philippine National Police (PNP), Armed Forces of the Philippines (AFP) ug Comelec nga gipatawag sa National Task Force Commander sa Honest Orderly and Peaceful Election (HOPE).
Ang Argo Forwarder maoy gitahasan sa pagdala sa tanang precinct count optical scan (PCOS) machines dinhi sa kinatibuk-ang Central Visayas nga gamiton sa automated election karung Mayo 10 apan wala makatunga sa maong conference kagahapon diha sa Police Regional Office-7.
Si Police Deputy director General Edgardo Acuña sa Camp Crame nga maoy gitudlong National Task Force Commander sa HOPE mituyo’g anhi dinhi sa Sugbu kagahapon diha sa PRO-7 alang sa maong tigom.
Daghan unta og mga pangutana ang mga mitambong aron mapangandaman ang paghatud sa tanang makina sanglit sulod sa 30 ka adlaw kinahanglang plantsado na tanan sa seguridad. (BANATNEWS)