CEBU, Philippines - Patay on the spot ang usa ka lalaki human kini pusila ug nahulog sa traysikol didto sa Tikyan road, sitio Sacres, barangay Banilad dakbayan sa Mandaue kagahapon sa kaadlawon.
Ang biktima mao si Excel Pacaña, 23, ulitawo residente sa dalan ML. Quezon barangay Maguikay dakbayan sa Mandaue ug lumad nga taga San Carlos City, Negros Oriental.
Samtang ang suspetsado mao ang magsuong Jovanie Jumao-as alyas Bansot, 29, ug maguwang niini nga si Alberto Jumao-as II, 25, ulitawo, mga residente sa sitio Sacres.
Base sa pasiunang imbestigasyon ni SPO1 Kerwin Bejer sa IDMB sa MCPO nasayran nga mga alas 2:30 kagahapon sa kaadlawon atol sa usa ka disco didto sa Bario Lapok, barangay Casuntingan dakbayan sa Mandaue, si Pacaña uban sa iyang mga higala sa dihang nagkaabot ang ilang dalan sa mga magsuong Jumao-as.
Gumikan kay adunay daang panagbingkil ang biktima ug ang magsuong Jumao-as, mitumaw ang mainitong panaglalis sa duha ka grupo.
Sa dihang nakadisider ang grupo ni Pacaña nga mopauli na lang sakay sa traysikol ni Eric Barangan, atol sa ilang pagbiyahe didto kini miagi sa lugar sa mga Jumao-as ug sa dihang nakita si Pacaña gipusil kini ni Jovanie diin sa unang pagbuto niini wala maigo ang biktima, apan sa ikaduhang pagbuto naigo si Pacaña ug nahulog sa traysikol.
Sa dihang miresponsde ang kapolisan sa IDMB uban ni SPO1 Bejer patay na ang biktima ug wala na madala sa tambalanan. - Bong Soriano (BANAT NEWS)