CEBU, Philippines - Gitambagan sa simbahang Katoliko sa Sugbo ang mga politiko nga moladlad sa tinuoray’ng mga plataporma de gobyerno niini inay nga magsigi lang kini og pasiatab sa ilang kaugalingon pinaagi sa mga paid advertisement sa radio ug telebisyon.
Ang Episcopal vicar sa Artsidyosesis sa Sugbo Msgr. Esteban Binghay mipasabot nga dili gyud kalikayan nga mohatag sa mga pahimangno ang simbahan sa mga kandidato tungod kay modagan man gihapon kini og simbahan ug mangumpisal sa mga higayon nga makahimo og mga sala.
Hinuon na-alarma ang simbahang Katoliko sa Sugbo sa grabe nga kainit sa politika karong panahona nunot ning nagsingabot nga eleksyon karung Mayo itandi sa mga nangaging eleksiyon.
Gibasehan ni Msgr. Binghay ang pagsugod dayon og pangampanya sa mga kandidato ma-lokal ug nasudnong posisyon bisan wala pa hingpit magsugod ang campaign period aron lang makabintaha ug modaog.
Alang kang Binghay init pa sa El Niño ang nagsingabot nga eleksyon karung tuiga hinungdan nga gitambagan niya ang tanang mga kandidato nga dili gyud hikalimtan ang Kahitas-an sa paghimo og mga pag-ampo aron magiyahan sa mga butang nga angay himuon ug dili angay himuon.
Gipasabot ni Msgr. Binghay nga lisod gyud nga mahitabo ang separation sa church and state tungod kay kanunay man mahilambigit ang Kahitas-an sa mga politikanhong kalihukan. Gibasehan niya ang pagdangop dayon sa mga politiko sa simbahan aron sa pagpangumpisal kun makahimo kini og mga kasal-anan. (Darrel A. Carumba) (BANATNEWS)