CEBU, Philippines - Gilusad kagahapon sa kapolisan ug sa mga opisyal sa Commission on Elections (Comelec) sa dakbayan sa Mandaue ang “Operation Baklas” aron pagtangtang sa mga political poster ug ubang propaganda material nga gipanaod sa mga dapit nga walay labot sa common poster area (CPA).
Ang kalihukan nila sa pagpanglaksi sa maong mga materyales nagsugod sa barangay Centro ug gilibot ang tanang suok sa dakbayan nga gipataptan og mga political propaganda material.
Ang gipaila sa Comelec isip CPA mao ang barangay hall, merkado publiko, public plaza, ug pribadong lugar nga may pagtugot sa tag-iya niini.
Sa miaging adlaw ang mga tinun-an sa Mandaue Science High School milusad sa kaugalingon nilang Operation Baklas ug daghan kaayong mga poster , streamer ug uban pang campaign material nga gipanangtang nila gikan sa mga pader, poste sa kuryente, kahoy ug uban pang gipataptan niini sa kadaplinan sa kadalanan nga gawas sa CPA.
Si Kapitan Carmelino del Mar sa Barangay Ibabao-Estancia nagkanayon nga gihigpitan nila ang kahinlo sa ilang barangay busa tanang mga materyales sa kampanya sa mga politiko nga wala sa hustong lugar gipanglaksi nila. (Romeo T. Limpangog) (BANATNEWS)