CEBU, Philippines - Patay diha-diha dayon ang usa ka lalaki human gipusil sa giingong drug pusher nga iyang nautangan pasado alas-7 sa buntag kagahapon sa sitio Cabangcalan barangay Bulacao.
Si Sonny Cañeda, 25, molupyo sa maong lugar ang gi-ulo pagpusil sa usa ka naila lang sa pangalang Gigi Batobato, taga Villa Bulsita barangay Bulacao nga giingong tigpamaligya og ilegal nga drugas sa maong dapit.
Nasayran nga ang biktima nagsakay sa usa ka traysikad nga gimaneho sa iyang igsuon nga si Christopher dihang kalit gipusil sa suspetsadong nag-atang sa eskina.
Tungod sa kakuyaw sa igsuon sa biktima mipabulhot kini og padagan padulong sa tambalanan apan wala na kini makaabot nga buhi.
Sa pakighinabi sa Banat News ni Geoffrey Gutual mibutyag nga base sa ilang imbestigasyon gikatahong may kalambigitan sa ilegal nga drugas ang hinungdan sa pagpamusil tungod kay ang biktima gikatahong utangan sa suspetsado nga mamaligya-ay usab og ginadiling drogas.
Ang suspek pabilin pang gawasnon. - Lesley Caminade (BANAT NEWS)