CEBU, Philippines - Baho nang nakit-an ug nahabwa ang ginhawaan sa usa ka mag-uuma nga gituohang gipatay ug gilabay sa usa ka sapa sa bukirang bahin sa barangay Mompeller lungsod sa Argao niadtong Miyerkules sa alas 9:00 sa buntag. Ang biktima mao si Victor Banagaso, molupyo sa sitio Malayahay barangay Lingigon lungsod sa Argao samtang wala pay matumbok nga responsable sa maong krimen.
Matud ni PO2 Bernie Lao sa Argao Police dihang nahinabi sa Banat News nakit-an nalang sa usa ka konsehal sa barangay nga si Efren Cabriana nga nagbuy-od kilid sa sapa nga hapit na malata ang patay'ng lawas gibana-banang 300 metros ang gilay-on gikan sa Mompeller Elementary School.
Ang biktima dunay dakong samad tinigbasan sa iyang tiyan nga maoy gituuhang nakaingon sa hinanali niining kamatayon.
Subay sa gihimong imbestigasiyon sa kapulisan ang asawa sa biktima nga si Eufemia Banagaso, midangop niadtong Domingo nga na-missing ang iyang bana gikan mitambong og tigbakay sa Mompeller.
Ang kabanay sa biktima igo nalang gipahibawo sa kapulisan sa patay'ng lawas niining nakaplagan daplin sa sapa.Gituohan sa kapulisan nga gipatay ang biktima ug igo lang gilabay sa maong lugar. – BANAT NEWS