CEBU, Philippines - Naghinol na karon sa bugnaw’ng kabilya sa karsel sa Presinto 5 sa dakbayan sa Mandaue ang 42-anyos nga lalaking gipasanginlang mibugaw sa usa ka 17-anyos nga dalagitang iyang gi-uyab-uyab ug mipahubo pa sa panty sa iyang biktima atubangan sa mga polis.
Ang gidakop mao si Roberto Malazarte, 42, taga Purok Limonsito, barangay Umapad, dakbayan sa Mandaue.
Si SPO1 Reynaldo Urot nga nahinabi sa Banat News miingon nga giplano na unta ni Inspector Wildon Abot, deputy chief sa Opao Police Station ang entrapment operation human moreklamo ang dalagita sa ilang buhatan nga ibaligya na kini ni Malazarte ngadto sa usa ka lalaki aron sa pagpakighilawas.
Matud pa ni Urot, ang biktima gikuyogan sa barkada niining babaye sa pagtaho ngadto sa ilang buhatan hinungdan nga ilang giplano ang entrapment operation batok kang Malazarte.
Apan samtang nagpadayon pa sa pagkuha og impormasyon sa biktima ang mga polis, kalit miabot si Malazarte ug isog kaayong mibunlot sa dalagita.
Gikatahong gimandoan dayon ni Malazarte pagpahubo ang panty sa dalagita atubangan mismo sa mga polis tungod kay siya maoy mipalit niini, tungod sa gibuhat ni Malazarte gidakop kini sa mga polis ug gibalhog sa karsel.
Ang dalagita diha na mitug-an sa kapolisan nga sa nag-edad pa siya og 15-anyos gisugdan na siya og lugos ni Malazarte ug ning bag-ohay lang nasayran niyang ibaligya na siya niini ngadto sa mga lalaking gusto og lawasnong kalipay. (BANATNEWS)