CEBU, Philippines - Ang kontrobersiyal nga police sa siyudad sa Sugbu nga si SPO1 Adonis Dumpit mi-plead not guilty kagahapon sa buntag atol sa gipahigayon nga arraignment sa kasong murder nga giatubang niini may kalambigitan sa pagpusil patay sa usa ka 17-anyos nga suspetsadong tulisan nga si Ronron Go lima na ka tuig ang nakalabay.
Si SPO1 Dumpit nga nagsul-ob sa iyang uniporme sa pagkapolis, wala moangkon sa maong salaod dihang gibasahan kini sa iyang kaso sa sala ni RTC-7 Branch 6 Judge Ester Veloso.
Si Veloso mi-arraign sa kaso human niini ibasura ang motion for reconsideration sa abogado ni Dumpit nga nag-aghat sa Korte nga usbon ang desisyon niini nga nagdumili sa pag-downgrade kasong murder ngadto na sa kasong homicide subay sa resulta sa reinvestigation sa Ombudsman for the Military and Other Law Enforcement Offices (MOLEO) nga nag-ingong angayang homicide lamang ang ipasaka batok sa maong polis.
Usa sa mga abogado ni SPO1 Dumpit nga si Atty. Frank Malilong mitug-an sa mga sakop sa media human sa arraignment nga moduso unya sila og mosyon nganha sa Korte aron makapiyansa si Dumpit.
Sumala pa niini nga dili angayang ibalhog si Dumpit tungod kay nagsunod lamang kini sa mandatos sa iyang trabaho pagkapolis dihang miresponde kini sa alarma ug napusilan ug napatay niini si Go samtang nagdepensa si Dumpit sa iyang kaugalingon dihang mibunot og armas si Go.
Matud pa ni Malilong nga ang ilang gibasehan sa pagpangayo sa Korte nga makapiyansa si Dumpit mao ang kahuyang sa mga ebidensiyang gihuptan sa prosecution.
Gani ila unyang ipresentar sa korte ang labing ulahing findings sa reinvestigation sa MOLEO. Human sa arraignment ni Dumpit gibalik pagbalhog sa karsel sa Criminal Investigation and Detection Group kon CIDG-7. (BANATNEWS)