CEBU, Philippines - Samdan sa nawong ang usa ka 21-anyos nga ulitawo dihang gipareglahan kini og dunggab samtang nangita siya sa iyang uyoan didto sa sitio Crossing, barangay Campo 4, dakbayan sa Talisay, kagahapon sa kaadlawon.
Ang biktima giila sa mga polis nga si Jerum Racal, taga Campo 4, samtang ang suspetsado mao usab si Melchor Labitad, hingkod, nga taga sitio Pamutan, barangay Pardo, dakbayan sa Sugbo.
Sa imbestigasyon sa kapolisan nasayran nga si Racal naglakaw sa karsada kay nangita sa iyang uyoan dihang nasugatan niya si Labitad nga nagkupot og kutsilyo ug sa walay igong hinungdan gikalit og hansak sa walang bahin sa nawong sa biktima.
Si Racal kinsa nabalaka nga patyon siya sa suspetsado, mikabad og dagan ug mao usab ang gibuhat ni Labitad mikaratel usab og dagan dayong sibat ug gipangita na siya karon sa kapolisan samtang si Racal anaa sa tambalanan. – BANAT NEWS