CEBU, Philippines - Gipasanginlan ni whistleblower ug mayoralty candidate Crisologo Saavedra si Mayor Tomas Osmeña sa dakbayan sa Sugbo nga miabusar na sa iyang gahom tungod sa pagpanangtang sa mga basketball boards nga gitaod diha sa nagkalain-laing barangay sa mga kaatbang.
Si Saavedra kinsa usa sa 11 ka mga kandidato sa pagkamayor sa dakbayan sa Sugbo nagkanayon nga kinahanglang hunungon na ni Osmeña ang pagpalarot sa mga basketball boards sa iyang kaatbang aron dili kini mapasanginlan nga miabuso sa iyang gahom.
Ang mga basketball boards nga gipangtaod sa oposisyon sa mga nagkadaiyang kabarangayan dinhi sa dakbayan ilabi na ang sa south district diin midagan si Osmeña atbang kang Jonathan Guardo gipatangtang sa mayor ug gipailisan sa iyang kaugalingong boards.
Gihulagway kini sa oposisyon nga usa ka matang basketball terrorism, apan ang mayor sa mga nanglabay’ng report mibarog nga ang dakbayan maoy magbuot sa boards nga ibutang sanglit gipanag-iya sa siyudad ang gitarukan sa basketbolan.
Ang ulahing insidente sa paglanglarot sa basketball board nahitabo diha sa mga sitio sa barangay Buot-taup, usa ka bukirang barangay sa habagatang bahin sa dakbayan sa Sugbo. Apan si Osmeña mipasabot niining buot lang niyang tudloan og leksiyon ang iyang kaatbang.
“I am reacting to vandals who remove government boards on government goals. Don’t you think it’s about time I should make these people respect the law? Then what’s to stop them from hanging their billboards on Magellan’s Cross?” pangutana pa sa mayor.
“The biggest vandal in the south district is Guardo and Alvin Garcia who dirty up streets with their ridiculous faces. Do you see a single poster of Tommy Osmeña plastered on your wall?” dugang pa niini kabahin sa mga campaign posters nga gipamilit karon sa oposisyon.
Matud sa mayor magpadayon ang pagpanangtang sa mga basketball boards nga gipanaod sa oposisyon kun dunay mga tawong moreklamo batok niini.
Ang kapitan sa Buot-taop nga si Ritchie Sibla nga kaalyado ni Guardo kahinumduman nga mireklamong gipanangtang sa mga sakop sa city hall ang ilang basketball board nga hinatag ni Guardo.
Ang pagtangtang matud pang Sibla gipanghingusgan sa kagawad sa ilang barangay nga si Kagawad Rosita “Daya” Calleno kinsa kanhi kapitan sa maong barangay ug kaalyado ni Osmeña.
Si Saavedra kinsa gidapit alang sa roundtable discussion sa The Freeman niadtong Biyernes midugang nga kung siya ang naa sa lugar sa mayor dili niya buhaton ang gibuhat niini karon sa pagpatangtang sa mga basketball board. (Brenda Batuto ug Rene Borromeo sa The Freeman) (BANATNEWS)