CEBU, Philippines - Gitakdang tambungan karong hapon sa mga magkaatbang nga mga politiko sa dakbayan sa Mandaue ang gradwasyon sa 130 ka mga estudyante sa nagkalainlaing kurso sa Mandaue City College (MCC) nga gidumala ni Dr. Paulus Marie Canete ,ang presidente sa maong tulunghaan.
Sila si Mayor Jonas Cortes ug Kongresista Nerissa Soon Ruiz sa ika-unom nga distrito maoy pinasidunggang dinapit sa maong kalihokan karong alas 4:00 sa hapon didto sa Cinema 3 sa Country Mall sa Banilad, dakbayan sa Sugbo.
Matud pa ni Canete nga si Senador Edgardo Angara maoy ilang dinapit nga guest speaker sa maong gradwasyon.
Samtang sila si Cortes ug Ruiz maoy kauban ni Angara sa pagpadasig sa mga mograduwar sa MCC.
Bisan magkaatbang sa pagka-mayor karong Mayo 10 nga piniliay, gipasabot ni Canete nga sa maong gradwasyon ihiklin sa duha ka kandidato ang politikanhong mga isyu, ug ang ipatigbabaw nila mao ang kaayohan sa tanan pinaagi sa pagpalambo sa edukasyon sa maong dakbayan. – BANAT NEWS