CEBU, Philippines - Naglunang sa kaugalingong dugo nga napalgang patay sa anak ang iyang inahan nga may samad pinusilan sulod sa ilang balay niadtong milabay’ng Huwebes sa hapon diha sa N. Bacalso Ave. barangay San Nicolas.
Si Cleofe Abadiano Bonachita, 58, molupyo sa maong lugar ang nakaangkon og samad pinusilan sa nawong ug walang tiyan human pusila sa wala pa mailhing mamumuno.
Sa pakighinabi sa Banat News kang PO3 Michael Codaste, kini mibutyag nga ang 14-anyos nga anak sa biktimang gikan pa sa eskuylahan maoy nakakaplag sa ginang.
Matud pa ni Codaste nahibulong ang bata nganong walay nangabli kaniya hinungdan nga iyaha gilili ang gate ug mao nalay iyang nalilian sa sulod ang nagbuy-od nga nagkadugong inahan diha sa may pultahan.
Tungod niini dali siyang nagpakitabang sa mga silingan ug gipugos pag-abli ang ilang gate ug gidala kini sa tambalanan apan gideklarar kini sa mga mananambal nga dead on arrival.
Matud pa ni Codaste nga ang mga silingan sa biktima mibutyag nga aduna sila’y nadunggang duha ka buto apan wala kini panumbalinga tungod sa pagtuong rebentador ra kadto.
Sa gipahigayong pagsukit-sukit sa mga imbestigador nasutang dunay pipila ka mga personahe ang gipangpasakaan sa biktima og kaso nga nagpuyo sa ilang mga luna.
Ang kapolisan misubay na karon sa maong mga tawo ug gipaabot nga sila apilon sa imbestigasyon may kalambigitan sa pagpatay sa maong ginang. - Lesley Caminade (BANAT NEWS)