CEBU, Philippines - Plantsado na ang pagpangandam sa kapolisan alang sa umaabot nga Semana Santa pinaagi sa pagbuhi sa Task Force Igmat sa kapolisan sa lalawigan ug sa mga siyudad nga naglakip sa pagdili sa pagpahigayon og mga bikini shows sa mga beach resorts.
Matud pa ni Cebu Provincial Police Director Erson Digal makighimamat siya uban sa gobernadora ug mayor sa Santa Fe nga diin nahimong dakong isyu ang Bikini Open sa lalawigan.
Apan dako ang pagtuo ni Digal nga ang maong kalihukan dili na gyud mabuhat karun nga tuiga tungod sa nahitabo sa duha ka personalidad nga napasakaan og kaso ni Gob. Gwendolyn Garcia tungod sa pagsul-ob og malaw-ay nga sinina. Ang nakasuhan mao ang mga artistang sila si Maui Taylor, Jennifer Lee, ug mga organizers niini tungod sa paglapas sa ordinansa sa lalawigan kabahin sa proteksyon sa dungog sa kababayen-an.
Hinuon ang mga gipangkiha nangayo na og pasaylo sa gobernadora ug misaad nga di na mousab ug motabang sa turismo sa lalawigan.
Ang task force pangulohan ni Supt. Eduard Saavedra gilangkuban sa Regional Mobile Group (RMG), Special Reaction Unit (SRU) ug pipila ka polis sa nagkadaiyang police station.
Sa laing bahin, andam na usab ang Cebu City Police Office alang sa seguridad sa mga relihiyosong kalihukan sa dakbayan. Si Sr. Supt. Patrocinio Comendador nagkanayon nga susama sa milabay’ng tuig nga preparasyon ang ilang giandam ilabi na sa mga lugar diin daghang modugok nga mga tawo. - BANAT NEWS