CEBU, Philippines - Napulo ug duha ka tawo ang nangaangol sa panagbangga sa duha ka pasaheroang jeep pasado alas-2 sa buntag kagahapon sa Osmeña Blvd. ug D.Jakosalem ning dakbayan.
Ang mga naangol mao ang mga pasahero sa duha ka pasaheroan nga sila si Ryan Pialago, 21, Arnel Boyonas, 23, Junrey Calo, 26, Railyn Sasil, 28, Christian Labaria, 15, Kennedy Lauron, 24, Armand, Cantancio, 20, Joey Beqemy Ariar, 24, Jonap Borlado, 24, Maricel Librado, 28, Miguelito Caroy, 22.
Ang nagbangga mao ang pasaheroang jeepney nga 21B (Mandaue-Cebu) nga gimaneho ni Jemel Potestad ug ang 11A (Inayawan-Colon) nga gimaneho ni Jovel Gumamera.
Nasayran nga ang 11A nagsubay diha sa D. Jakosalem St. dihang kalit nga gisungag sa 21B diha sa eskina sa dalan Osmeña ug tungod sa kakusog sa pagbangga nalahos ngadto sa poste sa kuryente ang 21B.
Ang mga pasahero sa duha nangadasok sa unahan ug nakaangkon og mga bun-og ug pangos sa kalawasan.
Ang mga pasahero lakip na ang drayber sa 21B daling gitabang sa mga nag-rescue nga mga sakop sa Emergency Rescue Unit Foundation (ERUF) ug gidala sa Cebu City Medical Center. – BANAT NEWS