CEBU, Philippines - Gipangangkon sa kampo ni Liberal Party nga nailhan na ug nagkadaghan na ang mga misuporta kang kanhi konsehal Hilario “Junjun” Davide III nga midagan karon pagka-gobernador sa lalawigan.
Si Ferliza Calizar-Contratista, media and event coordinator sa Good vs. Evil Brigade mibutyag nga nagkadaghan na karon ang misaad nga mosuporta kang Davide gikan sa mga kalungsoran sa probinsiya sa Sugbo.
Kini bisan paman nga menus kaayo ang ilang mga makinarya ug bag-ohay lang silang nakapaila-ila kang Davide ngadto sa mga taga lalawigan. Usa sa labing nakapaila og maayo kang Davide mao ang nahimo ug maayong record sa amahan sa kanhi konsehal nga si Chief Justice Hilario Davide Jr.
Ang programa sa radyo nga mao ang “Pagsulbong sa Kausaban” ug Good vs. Evil” kinsa si Contratista maoy anchor niining mga programaha usa sa nakatabang nga si Davide nailhan.
Ang mga maminaw sa maong programa kasagaran kanila mopadayag sa ilang mga komentaryo ug sentimento kabahin sa mga kontrobersiya nga nalambigitan sa kagamhanan sa probinsiya.
Matud usab ni Contratista nga kadaghanan sa mipadayag sa ilang mga komentaryo ug sentimento ang gusto na og kabag-ohan sa pamunoan sa probinsiya.
Gibutyag usab ni Contratista nga base sa survey sa usa sa mga lokal nga pamantalaan wala moubos ngadto sa 90 porsiyento ang pabor kang Davide. – BANAT NEWS