CEBU, Philippines - Kritikal ang kahimtang sa usa ka tanod human kini giatangan sa dalan ug gidunggab sa nag-inom nga mga estambay sa barangay Candabong lungsod sa Alcantara kagahapon sa alas 3:30 sa kaadlawon.
Ang biktima mao si Bobby Hernandez, tanod sa nahisgutang lugar, samtang ang suspek nailhan lang sa alyas nga Boklet, nagpuyo gihapon sa maong lugar.
Matud ni PO2 Herbert Lamosao sa Alcantara Police dihang nahinabi sa Banat News miangkas ang biktima sa motorsiklong gimaneho sa usa ka magtutudlo nga si Nagi Ando, paingon na pauli.
Apan pag-abot nila sa nahisgutang lugar gipara kini sa suspek ug mga barkada nga nag-inom niadtong higayuna hinungdan nga nihunong apan kalit gilipot sa suspek dayong dunggab sa bukobuko makausa ka higayun.
Ang biktima daling gidala sa Badian District Hospital apan gibalhin sa Vicente Sotto Memorial Medical Center (VSMMC) samtang ang gikatahapan daling miikyas.
Dugang ni PO2 Lamosao nga ang suspek usa kini sa nabutang sa watch list tungod sa pagpayuhot og gidiling drugas sa ilang lungsod. - Darrel Carumba (BANAT NEWS)